Бүгүн улуус баһылыгын бастакы солбуйааччы Василий Бураев сүрүн судаарыстабаннай уонна биир кэлим судаарыстыбаннай эксээмэннэр боппуруостарынан сүбэ мунньаҕы тэрийдэ. Тустаах тэрилтэлэр салайааччылара мустаннар ыксаллаах быһыы-майгы тахсар түгэнигэр, онтон хайдах тахсар суоллары тобуллулар.
Мунньахха үөрэх салалтатын, Ис дьыала отделын, олох-дьаһах коммунальнай хаһаайыстыбатын, РЭС, киин балыыһа, СЭС, “Эксперт Телеком” ХЭТ бэрэстэбиитэллэрэ, нэһилиэк оскуолаларын дириэктэрдэрэ кыттыыны ыллылар. Онтон нэһилиэк баһылыктара куйаар ситимин нөҥүө холбононнор иһитиннэриилэргэ кыттыстылар.
Сүрүн иһитиннэриини үөрэх салататын начальнига Юрий Шишигин оҥордо. Онно сырдатыллыбытынан, быйыл БКЭ-ни улуус үрдүнэн 145 үөрэнээччи, онтон сүрүн эксээмэни (ОГЭ) 279 оҕо туттарыаҕа. Эксээмэннэри туттарыы хампаанньата улуус үрдүнэн ааспыт сылга саҕаламмыт. Үөрэнээччилэр булгуччу туттарыахтаах эксээмэннэртэн ураты ханнык эксээмэннэри туттаралларын быһаарынан билигин бэлэмнэнэ сылдьаллар. БКЭ, ОГЭ туттарыытын кэмигэр ордук суол-иис, уот, интернет боппуруостара сытыытык туралларын бэлиэтээтилэр. Ол курдук эксээмэн кэмигэр уот барар түгэнигэр 15 мүнүүтэнэн эксээмэн буолбатах курдук ааҕыллар эбит. Итиэннэ, сибээс мөлтөөн 3-4 чааһынан интернет суох буолар кутталланар. Маныаха миэрэлэри эрдэттэн ылынар инниттэн тустаах тэрилтэлэр салайааччылара, бэрэстэбиитэллэрэ туох үлэ барарын билиһиннэрдилэр. Олох дьаһах хаһаайыстыбатын өттүттэн РИП-тар (резервный источник питания) эбии кэлэн туруохтаахтарын, суол-иис өттүгэр, муосталарга өрөмүөн үлэлэрэ барбыттарын туһунан Василий Иванович иһитиннэрдэ. БКЭ, ОГЭ кэмигэр диэри халаан уута, хара уута барыта кэлэн этэҥҥэ ааһыахтаах диэн сабаҕалыыллар. Онтон уот барыытын кэлиитин туһунан РЭС начальнига Сергей Антипин эксээмэннэр кэмнэригэр линияларга өрөмүөн үлэлэрин тохтотоллорун туһунан дьаһал тахсыбытын туһунан эттэ. Маны тэҥэ “Эксперт Телеком” ХЭТ Амма улууһугар бэрэстэбиитэлэ Дмитрий Исаков интернет ситимигэр аккумулятордары уларытыыга үлэ барыахтаах диэн кэпсээтэ. Уот барар түгэнигэр интернет быһа холоон 3-5 чаас туруон сөптөөх диэн ыйда.
Субу курдук улуус үрдүнэн эксээмэннэри ыытыыга, туттарыыга бары өттүнэн усулуобуйа тэриллэн үлэ былааннаахтык барар.
Источник: https://амгагазета.рф