Бу күннэргэ Аммаҕа С.Н. Донской аатынан үөрэҕи сайыннарар уонна идэни үрдэтэр үнүстүүт көҕүлээһининэн оҕо уһуйаанын эр дьон педагогтарын ахсыс пуорумнара буолан ааста. Тэрээһиҥҥэ Дьокуускайтан, Сунтаартан, Ньурбаттан, Намтан, Мэҥэ Хаҥаластан, Чурапчыттан, Тааттаттан, Үөһээ Бүлүүттэн, Үөһээ Дьааҥыттан, Амматтан уопсайа 26 педагог эр дьон кытынна. Бу педагогтарбыт араас дуоһунаска үлэлииллэр, кинилэр ортолоругар 3 сэбиэдиссэй, 12 физкультура инструктора, 6 эбии үөрэхтээһин педагоготара, 4 музыкальнай салайааччы, биир иитээччи баар.
Ол курдук пуорум чэрчитинэн “Мин – педагогпун” күрэххэ аҕыс эр киһи икки күн устата күрэхтэстилэр. Кинилэр түөрт түһүмэххэ бэйэлэрин үлэлэрин сырдатан, бырайыактарын көмүскээн, оҕолорго дьарыктары итиэннэ маастар-кылаастары ыытан, ким бастыҥын быһаардылар.
“Манна кыттар дьон номнуо бэйэ-бэйэлэрин билсэллэр, ол курдук ахсыс төгүллэрин кыттар дьон бааллар. Күрэххэ уопуттарын атастаһаллар, элбэх саҥаны билэллэр. Кыттааччы ахсаана элбиирэ эмиэ үөрдэр”, – диэтэ үөрэх салалтатын информационнай-методическай киинин сэбиэдиссэйэ Эмма Давыдова.
Күрэххэ хаһыс да сылын дьүүллүүр сүбэ чилиэнинэн үлэлиир Таатта Уолбатыттан сылдьар педагог Алек Кириллин быйылгы тэрээһин үрдүк таһымнааҕын бэлиэтээтэ. Алек Алексеевич бэйэтэ 2015 сыллаахха ыытыллыбыт “Мин – баспытааталбын” өрөспүүбүлүкэтээҕи күрэх муҥутуур чөмпүйүөнэ, өрөспүүбүлүкэ чиэһин Арассыыйа таһымыгар чиэстээхтик көмүскээбит педагог буолар.
“Дьон оҕо уһуйааныгар эр киһини көрөн, олус соһуйар. Ол иһин педагог эр киһи идэтин толору баһылаабыт буолуохтаах. Эр киһи уһуйааҥҥа кэллэ да, холобур буолар, дьахталлар ортолоругар үлэлиир киһи саҥата-иҥэтэ ыраас буолуохтаах”, – диэн Алек Кириллин этэр.
Икки күннээх үлэ түмүгүнэн, кыайыылаах үрдүк аатын Сунтаартан сылдьар эдэр педагог Геннадий Иванов ылла. Геннадий иитээччинэн үлэлээбитэ бэһис сылыгар барбыт, маннык күрэххэ аан маҥнайгытын кытынна.
Бу курдук пуорум үрдүк тэрээһиннээхтик ыытылынна. Педагогтар үлэлэрин эрэ тула буолбакка, эр дьон успуорт күрэҕэр, кэнсиэргэ, суббуотунньукка кыттан, бириэмэлэрин сэргэхтик уонна туһалаахтык атаардылар.