Үөрэх салататын көҕүлээһининэн үөрэх дьылын түмүктүүр “Дьиэ кэргэн оҕо иитиитигэр уонна быһыытыгар-майгытыгар эппиэтинэһэ” диэн ааттаах көмөлөһөр уонна сэрэтэр ис хоһоонноох төрөппүт улуустааҕы мунньаҕа ыытылынна. Манна мунньахтыыр саалаҕа 60, куйаар ситиминэн 22 төрөппүт сэбиэттэрин, кэмитиэттэрин кыттыылаахтара уонна педагогтар муһуннулар.
Тыл этээччилэр оҕону иитиигэ дьиэ кэргэн оруолугар, иитэр үлэни тэрийии хайысхаларыгар, эксээмэн иннигэр оҕоҕо хайдах көмөлөһөргө, идэни таба талыыга, оҕо эт-хаан өттүнэн чөл буоларыгар, дьиэ кэргэҥҥэ социальнай көмө, суол быраабылаларын кэһиигэ төрөппүт эппиэтинэһин туһунан, баһаарга сэрэхтээх буолууга, буруйу оҥорууну уонна бэрээдэги кэһиини сэрэтиигэ, дьиэ кэргэҥҥэ оҕону иитиигэ сахалыы эйгэни тэрийиигэ, бултааһын быраабылаларыгар бэйэлэрин сүбэлэрин биэрдилэр. Ол курдук үөрэх салалтатын начаалынньыга Ю.Е.Шишигин, улуус баһылыгын социальнай боппуруостарга солбуйааччы Н.И.Илларионова, өрөспүүбүлүкэтээҕи психологическай киин Амматааҕы салаатын педагог-психолога С.С.Андреева, нэһилиэнньэ дьарыктаах буолуутун улуустааҕы киинин салайааччыта Л.К.Вензель, ИДьМ улуустааҕы салаатын кадрга салаатын начаалынньыга Л.В.Малыкайцева, кииннэммит балыыһа оройуоннааҕы педиатра Е.Е.Трифонова, Амматааҕы нэһилиэнньэ уонна үлэ социальнай харалтатын салалтатын кылаабынай исписэлииһэ Н.В.Федорова, баһаары сэрэтэр сулууспа судаарыстыбаннай этэрээтин баһаары сэрэтиигэ инструктордара А.Н.Кочаткина, В.С.Новикова, суолга куттал суох буолуутун ыстаарсай судаарыстыбаннай иниспиэктэрэ Я.И.Слепцов, саастарын ситэ иликтэр дьыалаларын подразделениетын ыстаарсай иниспиэктэрэ Л.Н.Никифорова, саастарын ситэ иликтэр дьыалаларын уонна кинилэр бырааптарын көмүскүүр хамыыһыйа эппиэттээх сэкирэтээрэ В.И.Феоктистова, уопсастыбанньык А.З.Шишигина, айылҕа харыстабылын иниспиэксийэтин иниспиэктэрэ М.П.Парфенова төрөппүттэри кытта ирэ-хоро кэпсэттилэр, кыттааччылар ыйытыктарыгар сөптөөх хоруйдары биэрдилэр.
Мунньах түмүгүнэн 14 пууннаах резолюция тахсан оскуолаларга, уһуйааннарга тиийэн иитэр үлэ сайыҥҥы ыйдарга, онтон салгыы күргүөмнээхтик барыаҕа.
