Хайа баҕарар омукка оҕону иитиигэ төрөппүт оруола улахан. Ол курдук ийэ, аҕа норуотун үтүө үгэстэринэн оҕотун иитэр буоллаҕына сиэрдээх, ситиһиилээх киһи буола үүнэр. Оттон уһуйаан уонна оскуола маныаха көмө, тирэх буолаллар.
Бу үөрэх дьылыгар үөрэх салалтата төрөппүттэри кытта үлэтин былаан быһыытынан ыытар. Маныаха хас биирдии оскуола төрөппүттэрин сүбэтэ улахан эппиэтинэстээхтэр. Улуустааҕы төрөппүттэр сүбэлэрин бэрэссэдээтэлтнэн быйыл Чакыртан Ньургуйаана Михайлова талыллан үлэлээн эрэр. Үүммүт саҥа сыл улуустаҕы «Төрөппүт сүбэтэ-2023» күрэһинэн саҕаланна. Манна төрөппүттэр норуот үтүө үгэстэригэр, дойдуну таптыырга, айылҕа харыстабылыгар, үлэҕэ-хамнаска, идэни талыыга, успуорка, култуураҕа, уопуту тарҕатыыга, ыытыллыбыт үлэни сырдатыыга кыттыыларынан түмүк тахсыаҕа.
Улуус төрөппүттэрэ бу ыйга Болугурга ыытыллыбыт «Дэриэбинэ дьылҕата-норуот дьылҕата» диэн өр сылларга үөрэҕи сайыннарар уонна идэни үрдэтэр институкка үлэлээбит уопуттаах педагог, уһуйааччы, суруйааччы Гавриил Адамов кыттыылаах төрөппүт семинарыгар кытыннылар. Манна 80-тан тахса киһи элбэҕи иһиттэ, биллэ-көрдө, 10 төрөппүт тус уопуттарын кэпсээтилэр. Семинар кыттыылаахтара төрөппүттэр Бөтүҥтэн Никита Егоров, Эмистэн Альберт Соловьев, Анастасия Степанова, Сулҕаччыттан Вера Исакова, Оксана Бурцева, Чакыртан Ньургуйаана Михайлова, Светлана Новикова онтон да атыттар сүбэлэрин мустубут дьон сэҥээрэн иһиттилэр.
Оттон “Ийэ тылынан иитии – оҕо сайдар тирэҕэ” диэн ааттаах төрөппүттэр өрөспүүбүлүкэтээҕи сугулааннарыгар үөрэх салалтатын иитэр үлэҕэ салаатын сэбиэдиссэйэ Матрена Малыкайцева салайааччылаах 17 киһилээх улуус дэлэгээссийэтэ Дьокуускай куоракка кытта сылдьар. Амматтан «Хатыҥчаана» уһуйаан иитээччилэрэ Мария Неустроева, Ульяна Пахомова оҕо саҥата сайдыытыгар уһуйаан төрөппүттэри кытта үлэтин, Сатаҕай оскуолатын төрөппүттэрин сүбэтин бэрэссэдээтэлэ Марианна Дордосова түөлбэҕэ сахалыы куту төрүччүнэн иитиигэ быыстапкаҕа кытта сылдьаллар, маны таһынан дэлэгээттэр төгүрүк остуолга санааларын үллэстиэхтэрэ.
