Амма улууһун Мээндиги нэһилиэгин П.И. Караканов аатынан орто оскуола үөрэнээччилэрэ төрөөбүт төрүт тылбытыгар, сахалыы тылынан сайа саҥарыыга ураты болҕомтону уурдубут. Төрөөбүт төлкөлөөх ийэ тылбытын үөрэтии ис хоһоонугар өссө төгүл эргиллэн, сыныйан-сылыктаан көрүү наадата тирээн кэллэ. Бу туһаайыы иитии-үөрэх процеһын дьүөрэлииргэ, алтыһыннарарга табыгастаах, оҕо оскуолаҕа үөрэнэр кэмигэр ханнык баҕарар үөрэх предметин нөҥүө ытык өйдөбүллэри иҥэринэригэр, үөрэх сүрүн сатабылларын (бэйэни салайынар-дьаһанар, билэр-көрөр, бодоруһар сатабылы) сайыннарарыгар туһаайыллар.
Билиҥҥи саха тылын учууталын иннигэр билиини толору биэрии эрэ буолбакка, оҕону умсугутуу, интэриэһиргэтии, сонурҕатыы сыала эмиэ турар. Үөрэнээччи төрөөбүт тылын умсугуйан, ылларан туран ис сүрэҕиттэн үөрэтэрин ситиһии учуутал дьоҕуруттан, билиититтэн, үөрэтэр албаһыттан, ньыматыттан тутулуктаах.
Ол курдук быйылгы үөрэх дьылыгар 6-с уонна 7-с кылаас үөрэнээччилэрэ ютуб-ханаал арыйан саха тылын үөрэтэр сыаллаах “Тыл баайа” биэриини оҥорон саҕалаатыбыт. Номнуо 8-с биэриини таһаардыбыт. Бу биэриини оҥорон таһаарыыга Ян Григорьев, Күннэй Жиркова, Алия Деляева, Ньургун Старостин уонна Аман Павлов сөбүлээн туран дьарыктаналлар. Биэрии ыытааччыларынан Ньургун Старостин, Алия Деляева, Күннэй Жиркова уонна Аман Павлов буолаллар. Аман Павлов биэриини ханаалга таҥан таһаарар. Онтон видео5а Ян Григорьев сатабыллаахтык устар. Ол курдук антонимҥа, омонимҥа, синонимҥа, Кыайыы 75 сылыгар сэрии сылын оҕотун туһунан, сахалыы алаадьыга, саха атыгар, муос ытыкка, киһи этин-сиинин кэпсиир таһаарыылары оҕолор дьаныһан туран оҥорон дьон-сэргэ сэҥээриитигэр таһаардыбыт .
Амма улууһун
П.И.Караканов аатынан
Мээндиги орто оскуолатын
саха тылын уонна литературатын учуутала
Павлова Саскылана Семеновна
