Муус устар 5 күнүгэр Аан дойдутааҕы оҕо кинигэтин нэдиэлэтин чэрчитинэн В.Г. Короленко аатынан Амма № 1-дээх орто оскуолатыгар «Тɵрүт тыл сүмэтэ» алын сүhүɵх учууталларын норуот тылынан уус-уран айымньытын туhанан ахсаан, саха тыла, ааҕыы, тулалыыр эйгэ предметтэригэр сорудахтар хомуурунньуктарын сүрэхтэниитэ буолла. Кыттыыны ыллылар улуус алын кылаас, саха тылын уонна литературатын учууталлара, детсад иитээччилэрэ, оскуола библиотекардара уонна ыҥырыылаах ыалдьыттар.
Күн бастакы аҥарыгар алын сүhүɵх учууталлара «Тɵрүт тыл сүмэтэ» хомуурунньук матырыйаалларынан аhаҕас уруоктар, кылаас таhынан дьарыктары ыытан кɵрдɵрдүлэр. Оҕо билэр-кɵрɵр дьоҕурун, сүрүн үɵрэнэр сатабылларын сайыннарарга тууhаайыылаах солун уроктар дьон-сэргэ үрдүк сыанабылын, сэҥээриитин, биhирэбилин ыллылар.
Күн иккис аҥарыгар үɵрүүлээх тэрээhин ырыа куттаах Далбар хотуттар «Күɵгэйээнэ» түмсүү алгыстаах тылынан, директор Ларионов Н.А. эҕэрдэ тылынан аhылынна. Кинигэ күн сирин кɵрɵрүгэр үлэлэспит алын сүhүɵх учууталлара хомуурунньук оҥоруутугар, матырыйааллары таҥыытыгар сүҥкэн үлэ барбытын туhунан ураты сэргэхтик кэпсээтилэр. «Бичик» кинигэ кыhатын методист-эрэдээктэрэ М.Г. Никифорова, учууталлар идэлэрин үрдэтэр институт нуучча, саха кафедратын доцена В.Р. Шишигина, Амматааҕы үɵрэх салалтатын специалиhа Е.В. Огоюкина учууталлар сыралаах үлэлэрин үрдүктүк сыаналаан, искусство, технология предметтэригэр сорудахтар таҥыллан ɵссɵ биир хомуурунньук тахсарыгар баҕа санааларын эттилэр, опыттарын тарҕаппыттарынан туоhу суруктары туттардылар.
«Тɵрүт тыл сүмэтэ» хомуурунньук күн сирин кɵрɵрүгэр күүстэрин, кыахтарын уурбут Амма № 1-дээх орто оскуолатын алын сүhүɵх учууталларыгар (салайааччы Федорова Е.Н.), оскуола коллективыгар, редактор Марина Георгиевна Никифороваҕа сыралаах үлэҕит сыаналаннын, ситиhиилээх буоллун, учууталлар айар-тутар үлэлэригэр тɵhүү күүс буоллун.