Кулун тутар 26 күнүгэр Мээндиги оскуолатыгар Сунтаар, Амма алын кылаастарын учууталларыгар семинар буолан ааста. Семинарга улууспут оскуолаларыттан 32 учуутал, Сунтаар 10 оскуолатыттан 23 учуутал кытыыны ыллылар.Күн бастакы аҥарыгар Мээндиги оскуолатын учууталларын үлэлэрин опыта тарҕанна. Эбиэт кэннэ үлэ тэтимнээхтик салҕанна. Мээндигилэр “Грани качества” бырайыактарын методическай группалар салайааччылара кэпсээтилэр уонна улууспут оскуолаларын учууталлара 8 секциянан 3 бырайыагы уонна 5 мастер-кылааһы ыыттылар, 4 секциянан дидактическай оонньуулары оонньотон көрдөрдүлэр, выставка туруордулар. Төгүрүк остуолга ыалдьыттарбытыттан элбэх сонуну иһиттибит. Кэлбит дьон бары семинарга үрдүк сыанабылы биэрдилэр, биһирээтилэр, астыммыттарын бэлиэтээтилэр. Биһигиттэн 14 оскуолаттан 30-тан тахса учуутал, Сунтаартан 12 оскуола опыттара тарҕанна. Ону таһынан мээндигилэр баай астаах остуолу тардан мёд, дьэдьэн амсатан дьон астыныахтарын астыннылар. Нэһилиэк музейа баай историятын сиһилии билсистилэр, сөҕө махтайа иһиттилэр. Нэһилиэк олохтооҕо Семен Дуюков бары ыалдьыттарга алгыстаах айар оҥоһугун кырыйталаан, бэйэтин материалыттан ламинаттаан бэлэхтэтэлээтэ, ону таһынан Эмис оскуолатын оҕолоро оҥорбут сардаана сибэккилэрин, начальнай учууталлара анаан оҥотторбут Кыыс Амма өйдөбүнньүк бэлэхтэрин тутан долгуйа махтаннылар. Мээндиги коллектива түмсүүлээҕин, маннык семинардары ыытар кыахтааҕын көрдөрдө. Онон семинары үрдүк тэрээһиннээхтик ыыппыккытыгар, дьон биһирэбилин, үрдүк сыанабылын ылбыккытыгар оскуола коллективыгар улахан махталбытын тиэрдэбит.
Сунтаар Амма алын сүһүөх учууталларын семинарын иккис күнэ эмиэ үтүө түмүктэрдээх ааста. Ол курдук үөрэх салалтатын начальнига Шишигин Ю.Е. икки массыына биэрэн Амма нэһилиэгин көрдөрөр чиэскэ тигистибит. Л.В.Киренскай музейын директора Бессонова В.Н. Амма нэһилиэгин саҥа спортивнай объектарын, Кыыс Амманы, музыкальнай оскуола баай историяларын сиһилии кэпсээн кэрийтэрдэ. Манна ДЮСШ, музыкальнай школа, Амма лицейын, Амма 1 нүөмэрдээх оскуолатын салайааччылара, учууталлара бары үлэлиир сирдэригэр үөрэ-көтө көрүстүлэр, үлэлэрин билиһиннэрдилэр. Арчы дьиэтин директора Неустроев П.Ф. ыалдьыттары үгүс кэпсээннээх көрүстэ, алгыстаан атаарда. Онон бука бары Амма улууһун ыалдьытымсах үтүө дьонун-сэргэтигэр Сунтаардар махтанан, үөрэн-көтөн айаннаатылар. ДЮСШ, АСОШ1, Амма лицейын, Бөтүҥ оскуолатын, музыкальнай оскуола, Арчы дьиэтин салайааччыларыгар махталбытын тириэрдэбит. Үлэҕит таһаарыылаах буоллун.