Быйыл Республикаҕа оскуола иннинээҕи саастаах оҕолор уһуйааннара тэриллибитэ 100 сааһын бэлиэтиибит. Амма улууһун 18 уһуйааныгар уонна Сэргэ-Бэс ситэтэ суох орто оскуолатын икки бөлөҕөр 1604 оҕо билии-көрүү бастакы олуктарын ылаллар. 3-7 гэр диэри саастаах оҕолору уһуйаанынан хабарга 2015 сыллаахха чааһынай урбаанньыт Шараборина Надежда Васильевна “Светлячок” уһуйаанын арыйан элбэх төрөппүт махталын ылбытын бэлиэтиибит.
Оҕо дьиэ кэргэҥҥэ иитиитин таһынан оскуолаҕа киирэн үөрэнэригэр бастакы олуктары уһуйааҥҥа ылар. Иитээччилэр оҕо туохха интэриэстээҕинэн, дьоҕурдааҕынан көрөн эбии үөрэхтээһин студияларыгар дьарыктыыллар. Хамсык кэмигэр олорон хаалбакка, оҕолор араас таһымнаах күрэхтэргэ кыттыыны ылан ситиһиилэринэн төрөппүттэрин, иитээччилэрин үөртүлэр..
Быйылгы үбүлүөйдээх сылга уһуйааннарбыт ситиһиилэринэн үөрдэллэр: Алтаннааҕы «Кэскил» уһуйаан (сэбиэдиссэй Васильева Марина Николаевна, сүрүннүүр иитээччи Гаврильева Александра Егоровна) Бүтүн Россиятааҕы «Россия үөрэхтээһинин киэн туттуута» көрүү-күрэх кыайыылааҕынан буоллулар.
Болуругдааҕы «Колосок» уһуйаан (сэбиэдиссэй Никифорова Анастасия Николавна, сүрүннүүр иитээччи Михайлова Ульяна Майродовна) республикатааҕы «Сыл бастыҥ тыа уһуйаана – 2020» күрэх кыайыылааҕынан буолла.
Бүтүн Россиятааҕы «Россия иитээччилэрэ» күрэх республиканскай этабыгар «Радуга» ОСК иитээччитэ – Давыдова Ольга Федоровна «Сыл бастыҥ иитээччитэ» номинация кыайыылааҕынан ааттанна.
Бүтүн Россиятааҕы дошкольнай үөрэхтээһин дистанционнай съеһин «Уустук санитарно-эпидемиологическай кэмҥэ бастыҥ салайыы практиката» көрүү кыайыылааҕынан Чапчылҕаннааҕы «Колобок» уһуйаан (сэбиэдиссэй Максимова Ольга Георгиевна, сүрүннүүр иитээччи Киселева Любовь Петровна) үөрүү өрөгөйүн биллэ.
Республикаҕа сахалыы иитэр-үөрэтэр уһуйааннар программалара ФГОСка сөп түбэһэр гына саҥардыллан, оҥоһуллан бэчээттэнэн таҕыста. Бу программаны оҥорууга «Хатыҥчаана» уһуйаан сүрүннүүр иитээччитэ Неустроева Мария Петровна рабочай бөлөххө киирэн үлэлэстэ. Үбүлүөйдээх сылга республика бары сахалыы иитэр-үөрэтэр уһуйааннара саҥа «Кустук» программанан үлэлиэхтэрэ. «Бичик» национальнай кинигэ кыһатын издательствотыгар «Киистэ кэпсээнэ» хартыынанан оҕо ситимнээн кэпсиир дьоҕурун сайыннарыыга методическай босуобуйа бэчээккэ сылдьар. Бу босуобуйа ааптара Рязанская Екатерина Филипповна, Сулҕаччытааҕы «Чычып-чаап» уһуйааҥҥа өр сылларга иитээччинэн үлэлээн бочуоттаах сынньалаҥҥа олорор.
Өр сылларга дошкольнай үөрэхтээһиҥҥэ билиилэрин, сатабылларын ууран туран үлэлээбит дьоммут сыралаах үлэлэрэ бэлиэтэммититтэн үөрэбит:
Ол курдук, улууска уһуйааннары салайан, иилээн-саҕалаан кэлбит Чупрова Вера Васильевнаҕа «Саха Республикатын үөрэхтээһинин үтүөлээх үлэһитэ» аат иҥэрилиннэ.
«Саха Республикатын үөрэҕин туйгуна» бэлиэнэн Васильева Марина Николаевна Алтаннааҕы «Кэскил» уһуйаан сэбиэдиссэйэ, Ларионова Елена Ивановна, Эмистээҕи «Чуораанчык» уһуйаан иитээччитэ наҕараадаланнылар.
«Саха Республикатын дошкольнай үөрэхтээһинигэр кылаатын иһин» бэлиэнэн Александрова Светлана Ильинична, Болугурдааҕы «Туллукчаана» уһуйаан сэбиэдиссэйэ, Бысыева Екатерина Кимовна, «Радуга» ОСК иитээччитэ бэлиэтэннилэр.
«Саха Республикатын үөрэхтээһинин систиэмэтин ветерана» бэлиэни Портнягина Зоя Егоровна, «Радуга» ОСК иитээччитэ тутта.
«Российскай Федерация иитиигэ уонна үөрэхтээһиҥҥэ бочуоттаах үлэһитэ» анал бэлиэнэн бэлиэтэннилэр: Гаврильева Александра Егоровна, Алтаннааҕы «Кэскил» уһуйаан сүрүннүүр иитээччитэ, Ильина Анна Васильевна, Сатаҕайдааҕы Д.Г.Готовцева аатынан ОСК сүрүннүүр иитээччитэ, Мартынова Галина Кимовна, Өнньүөстээҕи «Дуораанчык» уһуйаан сүрүннүүр иитээччитэ, Мухина Надежда Николаевна, Болугурдааҕы «Колосок» уһуйаан иитээччитэ, Владимирова Евдокия Николаевна, Соморсуннааҕы «Чэчир» ОСК музыкальнай салайааччыта, Никифорова Любовь Спиридоновна, Бөтүҥнээҕи «Мичээр» ОСК иитээччитэ, Давыдова Эмма Валерьевна, улуустааҕы үөрэх салалтатын специалиһа.
Российскай Федерация үөрэҕин министиэристибэтин Бочуотунай Грамотатынан Кривогорницына Оксана Сорокгодовна, «Кэнчээри» ОСК иитээчитэ, Дьячковская Анна Семеновна, «Сардаана» ОСК логопеда бэлиэтэннилэр.
Российскай Федерация үөрэҕин министиэристибэтин Махталынан бэлиэтэннилэр: Пахомова Ульяна Дмитриевна, «Хатыҥчаана» уһуйаан иитээччитэ, Полуэктова-Шараборина Надежда Васильевна, «Светлячок» уһуйаан салайааччыта, чааһынай урбаанньыт.
Буолаары турар Бүтүн Россиятааҕы оскуолаҕа киириэн иннинээҕи саастаах оҕолор тэрилтэлэрин үлэһиттэрин күннэринэн, бары уһуйааннар үлэһиттэрин, ветераннарын итиитик-истиҥник эҕэрдэлиибит. Оҕо туһугар үлэлиир үлэҕит үтүө түмүктэрдээх буоллун. Оҕо үөрүүтүнэн, дьоллоох саҥатынан, төрөппүт махталынан уһуйааҥҥыт толору буоллун, бары дьоллоох, доруобай-чөл буолуҥ.
Эмма Давыдова,
улуустааҕы үөрэх салалтатын специалиһа.