Бүгүн ханна да буоларын курдук Аммаҕа 11-с кылаас үөрэнээччилэрэ нуучча тылыгар биир кэлим эксээмэни туттарарга холоннулар. Хара сарсыардаттан Владимир Расторгуев аатынан 2-с нүөмэрдээх орто оскуолаҕа Бөтүҥ, Чапчылҕан, Амма нэһилиэгин үөрэнээччилэрэ эксээмэни туттараары долгуйа муһуннулар.
Биир кэлим эксээмэни туттарыы, тутуу боппуруостара улуус таһымыгар барыта быһаарыллан тураллар. Ол курдук улуус дьаһалтата ааспыт нэдиэлэҕэ тэрээһин боппуруостарынан сүбэ мунньахха суол-иис, уот, интернет ситимин тула баар кыһалҕаларга тохтоон, ону туоратыыга үлэ-хамнас баран турар. Аны ыам ыйын 26 күнүттэн улуус оҕолоро биир кэлим эксээмэннэрин 5 нэһилиэккэ арахсан туттарыахтара. Ол эбэтэр Алтан орто оскуолатыгар Эмис, Сатаҕай, Соморсуҥҥа Абаҕа, Мээндиги, Сулҕаччы, Болугурга Амма Наахара, Майскай уонна Амма 2 нүөмэрдээх орто оскуолатыгар Бөтүҥ, Чапчылҕан, Амматааҕы лиссиэй, 1 нүөмэрдээх орто оскуолалара
туттарыахтара. Онтон Чакырдар өрүс уҥуор олорор буоланнар кинилэр эксээмэни бэйэлэрин оскуолаларыгар туттарыахтара.Биир кэлим эксээмэни тутууга онно сөптөөх усулуобуйаны тэрийиигэ ыстаап чилиэннэрэ эрдэттэн бэлэмнэнэллэр. Кинилэр бэриллибит методическай сүбэлэри, быраабылалары барытын толорорго дьулуһаллар.
”Бүгүн нуучча тылын холонон туттарыыга 5 оскуолаттан уопсайа 93 үөрэнээччи туттарыаҕа. Барыта инструкциянан барар. Учууталлар эрдэ кэлэннэр бэлэмнэр. Биир кэлим эксээмэни тутуу ыам ыйын 26 күнүттэн саҕаланар. Эксээмэни тутуу пуунугар учууталлар сарсыарда 8 чааска, оҕолор 9 чааска баар буолуохтаахтар. Быйыл масочнай эрэһиим суох эрээри оҕолор бары термометрияны ааһаллар. Эксээмэҥҥэ киирэллэригэр оҕолор паспордаах уруучукалаах, уулаах уонна кыра астаах киириэхтэрин сөп. Телефоннарын бары учууталлар, үөрэнээччилэр аллараа вахтаҕа туттараллар. Быйыл улахан уларыйыы киирбэтэ эрээри, сорудахтары эксээмэн тутар кабинекка тута бэчээттээн таһаарыахтара”- диэн биир кэлим эксээмэни 0243 тутуу пуунун салайааччыта Екатерина Портнягина кэпсээтэ.
Подробнее: https://амгагазета.рф/article/97496