Успуорду сэҥээрэр оҕолор сайын аайы “Олимп” лааҕырга астына сылдьаллар. Лааҕыры Амматааҕы Н.С. Захаров-Сахаачча аатынан оҕо успуордун оскуолата үлэлэтэр. Оҕолор манна сынньалаҥы уонна дьарыгы дьүөрэлии туталлар. Лааҕырга барыта 100 иитиллээччи баар. Кинилэри 6 хайысханан 9 тренер дьарыктыыр. Ол курдук көҥүл тустуу, хайыһар, чэпчэки атлетика, волейбол, мас тардыһыы, буулдьанан ытыы көрүҥнэрэ бааллар. Пуобардар Алена Изотовна Жиркова уонна Альбина Семёновна Константинова астара куруук минньигэс буолар. Оттон лааҕыры начаалынньык Яков Яковлевич Павлов сатабыллаахтык салайар.
Спорт лааҕыра бэс ыйын 19 күнүттэн үлэлиир. Билигин иккис сезон түмүктэнэн эрэр. Оҕолор сарсыарда 7 чааска туран эти-хааны уһугуннаран сэрээккэлииллэр, сууналлар-тарааналлар, аһыыллар, ол кэниттэн кылгас сынньалаҥ кэнниттэн бастакы дьарыктар саҕаланаллар. Дьарык кэнниттэн сынньалаҥнарыгар оҕолор тренердэрин кытта Амма өрүскэ сөтүөлүү киирэллэр. Минньигэс эбиэт кэнниттэн кыратык утуйан сынньанан баран кыратык үссэнэллэр. Киэһээҥҥи дьарыктар 5 чаастан саҕаланаллар, ол кэнниттэн эмиэ сөтүөлүүллэр. Сынньалаҥ кэнниттэ киэһээҥҥи аһылык буолар. Иллэҥ бириэмэлэригэр оҕолор футбол, волейбол оонньууллар, Амма кэрэ айылҕатыгар дуоһуйа сынньаналлар. Атырдьах ыйын 9 күнүттэн үһүс сезон саҕаланыаҕа.
