Амма нэһилиэгин Саргылана Петрова салайааччылаах «Хатыҥчаана» уһуйаан биир идэлээхтэригэр ыыппыт «Мэри Поппинс чымадаана» диэн маастар кылааһа улуус иитээччилэрин, исписэлиистэрин улахан сэҥээриилэрин ылла.
Амма нэһилиэгин «Хатыҥчаана» уһуйаана оскуола иннинээҕи үөрэхтээһин төрүттэммитэ 100 сылыгар анаан «Мэри Поппинс чымадаана» күрэхтэһиини бэйэтин педагогтарыгар ыытта. Бу хас биирдии оҕо дьоҕурун, кыаҕын учуоттаан бары өттүнэн сайыннарар сыаллаах үлэ иитээччилэри аныгылыы үлэ көрүҥүн, ньымаларын туһаналларыгар, босуобуйалары оҥорорго айымньылаахтык үлэлииллэригэр көҕүлүүр.
Балаһыанньа быһыытынан чымадааҥҥа хас биирдии оҕо уратытын, доруобуйатын туругун учуоттаан, оҕо өйүн сайыннарар оонньуулар, дьарыктар хааланнылар. Барыта бу уһуйаан 24 педагога кытынна. Түмүккэ кыайыылаахтарынан тахсыбыт Ульяна Пахомова «Дьиктилээх хомулук», Дария Маркова «Айыыналыын оонньуохха», Анастасия Чикальдина «Аҕа дойду сэриитэ. Хроника» онлайн маастар кылаастары ыыттылар. Кыттааччылар үлэлэрин улуус 66 педагога олус сэҥээрдэ.
Эмма Давыдова, үөрэх салаатын методическай салаатын сэбиэдиссэйэ: «Улуус уһуйааннарын иитээччилэригэр аналлаах иитээччи педагогическай лабораториятын бүгүҥҥү ыалдьыттарынан «Хатыҥчаана» уһуйаан педагогтара буоллулар. «Мэри Поппинс чымадаана» күрэхтэһиигэ иитээччилэр оҕону сайыннарар бииртэн биир үчүгэй оонньууларын улуус бары уһуйааннарын дьүүлүгэр таһаардылар. Манна ФГОС үөрэтэр, иитэр бары хайысхата барыта хабыллыбытын үгүстэр сэҥээрдилэр. Холобур, биир хоппоттон (кимиэхэ эрэ шкатулка, чымадаан, хомуот, уо.д.а) таайтарыылаах, аптаах холбуйачаантан бииртэн биир дьикти оҕо интэриэһин тардар оонньуулар хостонон истилэр. Гульнара Толстоухова оҥорбут Амма нэһилиэгин макетынан оҕо оскуола, детсад, балыыһа, кулууп ханна баарын билэ үөрэнэр. Эдэр логопед учуутал Марина Павлова лэпбуга оҕо тыла, моториката сайдарыгар элбэҕи биэрэр. Александра Куприянова «Аптаах хомуота» элбэх оҕону интэриэһиргэтэр. Туяра Борисова, Ульяна Пахомова айбыт хомулук балаҕаннарынан оҕо бэйэтэ талах олоппоһу таҥан өбүгэбит олоҕун-дьаһаҕын кытта толору билсэр. Куйаар да ситиминэн иитээччилэр «Хатыҥчаана» иитээччилэрин лабораторияларыттан элбэҕи биллилэр-көрдүлэр, чахчы туһалаах оонньууларынан оҕолору сайыннаралларын итэҕэйдилэр. Кэлэр сырыыга «Сардаана» оҕону сайыннарар киин иитээччилэрин лабораторията биир идэлээхтэрин ыҥырар. Ахсынньы ыйга «Дьиэ кэргэн уонна биһиги» бырайыагынан «Радуга» оҕону сайыннарар киин иитээччилэрэ эмиэ бэрт сэргэх, сонун хайысханы көрдөрбүттэрэ».
Мария Неустроева, «Хатыҥчаана» уһуйаан сэбиэдиссэйин иитэр, методическай үлэҕэ солбуйааччы: «Мэри Поппинс чымадаана» күрэхтэһиигэ уһуйааммыт барыта 24 иитээччитэ кыттыбытыттан кыайыылааҕынан тахсыбыт 14 иитээччи, исписэлиис улуустааҕы салайааччыбыт Эмма Давыдова көҕүлээһининэн тэриллибит уһуйаан иитээччилэрин мастарыскыайыгар оҕону иитиигэ, үөрэтиигэ араас хайысхалары хабар оонньуулардаах холбукаларын биир идэлээхтэригэр көрдөрдүлэр, кэпсээтилэр. Бииртэн биир дьикти, тупсаҕай оҥоһуулаах, хатыламмат ис хоһоонноох оонньуулар истээччилэр сэҥээриилэрин ыллылар. Инникитин маннык үлэ ыытыллан, иитээччилэр, оҕолорбут сайдалларыгар кыаҕы биэриэҕэ диэн эрэнэбин».
Ульяна Михайлова, Болугурдааҕы «Колосок» уһуйаан сүрүннүүр иитээччитэ: «Ураты толкуйдаах хаппахтаах, сабыылаах холбука, хоппо иһигэр элбэх кистэлэҥнээх, таабырыннаах, соһуччу үөрүүлээх, интэриэһинэй маллаах буолар. Былыр эбээлэрбит хопполоро, сундууктара оннук этилэр. Аны иккис ис хоһоонунан хоппоҕо мунньаҕын, хаалыыгын, уурунаҕын диэн өйдөбүллээҕэ. Ол аата биһиги түгэммитигэр методиканы хаһааныы буолар, онон «Хатыҥчааналар» бу аатынан үлэни табатык тайаммыттара буолар. Бары хайысханы хабан, киэҥ ис хоһоонноох үлэ ыытыллыбыт, ситимнээх оонньуу мунньуллубут. Өссө төһө баҕар байытыахха, сайыннарыахха сөптөөх толкуйдар, сонун көрүүлэр бааллар дии санаатым. «Иитээччи лабораторията» диэн үлэ уопутун тарҕатар сибиэһэй сүүрээни, сонун көрүҥү салайааччыбыт Эмма Валерьевна Давыдова киллэрбитин бэлиэтиирбит тоҕоостоох. Биир идэлээхтэрбэр өссө үрдүк ситиһиилэри, айымньылаах үлэни баҕарабын».
