Кулун тутар 9 күнүгэр Амма улууһугар-устуоруйа нэһилиэстибэтин уонна дойдуга тапталы иитии сылыгар аналлаах Амма улууһугар аан бастаан ыытыллар «Ийэ уонна кыыс көлүөнэ ситимэ» күрэх кэрэ кыргыттарга, истиҥ ийэлэргэ ананан ыытылынна. Бу бырайыак ааптарынан Амматааҕы айар сайдыы киин «Куо» куруһуогун салайааччыта Ньургуйаана Колосова буолар.
Күрэх сыала-соруга: Кыыс оҕо уонна ийэ истиҥ-иһирэх сыһыаннарын, илгэлээх Иэйэхситтэн анаппыт абылаҥнаах күүстэрин холбоон олоҕу салҕааччы буоллалларын бигэргэтии; Кыыс оҕону дьиэ кэргэҥҥэ ийэ бэйэтин холобурунан иитэрин кыыс оҕо өбүгэтин үтүө үгэстэрин салҕааччы, ситимнээччи буоларын чиҥэтии; Оҕолор бэйэ-бэйэлэригэр истиҥ доҕордуу сыһыаны үөскэтии буолар.
«Ийэ уонна кыыс көлүөнэ ситимэ» күрэххэ барыта алта ийэлээх кыыс кыттыыны ыллылар.
Дьүүллүүр сүбэҕэ Амма улууһун баһылыгын социальнай боппуруоска солбуйааччыта Нюргуяна Ивановна Илларионова, Амма оройуонун үөрэҕэриигэ салалтатын, иитии уонна эбии үөрэхтээһин отделын салайааччыта Матрена Юрьевна Малыкайцева, Амма нэһилиэгин дьахталларын сэбиэтин бэрэссэдээтэлэ Надежда Васильевна Кузьмина, Саха өрөспүүбүлүкэтин уус-уран оҥоһуктарын маастара Ульяна Майродовна Михайлова, Амматааҕы кииннэммит библиотечнай тиhик сүрүннүүр методиһа Анна Владимировна Слепцова, Амматааҕы оҕо искусствотын преподавателэ Клавдия Маратовна Юнчанова үлэлээтилэр.
Күрэх 3 түһүмэҕинэн ыытыллынна:
I «Бэйэни билиһиннэрии» түһүмэххэ – 5 мүнүүтэ иһигэр кыттааччылар талааннарын-дьоҕурдарын, дьиэ кэргэҥҥэ тутуһуллар үтүө үгэстэрин арыйан кэпсээтилэр.
II «Иис кустуга» түһүмэххэ – Кыттааччылар кыбытан – аттаран тигии ньыматынан, кырадаһынтан кыбытыылаах иннэлиги 1 чаас иһигэр тиктилэр.
III «Тургутук» түһүмэххэ – Блиц-ыйытыыларга хоруйдаатылар.
Түмүккэ кыайыылааҕынан О.П. Иванова-Сидоркевич аатынан Амматааҕы айар сайдыы киин «Куо» куруһуок иитиллээччитэ, Л.В. Киренскай аатынан Амматааҕы лиссиэй 7 кылааһын үөрэнээччитэ Вика Александрова, ийэтинээн Елена Семеновналыын таҕыстылар.
Иккис үрдэлгэ Эдэр туристар станцияларын иитиллээччитэ, Л.В. Киренскай аатынан Амматааҕы лиссиэй 7 кылааһын үөрэнээччитэ Айна Чаприна, ийэтинээн Анна Егоровналыын таҕыстылар.
Үһүс үрдэлгэ Амматааҕы айар сайдыы киин «Утахчаан» куруһуок иитиллээччитэ, А.П. Рязанскай аатынан Соморсун орто оскуолатын 6 кылааһын үөрэнээччитэ Алина Максимова, ийэтинээн Елена Романовналыын таҕыстылар.
«Уран ситим» – Е.А. Шишигин аатынан Сатаҕай орто оскуолатын 8 кылааһын үөрэнээччитэ Инна Онуфриева, ийэтинээн Анна Васильевналыын;
«Төрүт ситим» – А.Е. Кралин аатынан Абаҕа орто оскуолатын 7 кылааһын үөрэнээччитэ Эдилия Третьякова, ийэтинээн Агафья Игнатьевналыын;
«Талба ситим» – Ф.Лобанов аатынан Чапчылҕан оскуолатын 5 кылааһын үөрэнээччитэ Нарыйаана Ефремова, ийэтинээн Надежда Елисеевналыын.
Бары кыттааччыларбытыгар үрдүк ситиһиилэри, киэҥ дабайыылары, төрөөбүт дойдубут, тапталлаах Аммабыт чэчирии сайдарыгар бары биир санаанан айыаҕыҥ-тутуоҕуҥ, үлэлиэҕиҥ диэн ыҥырабыт!!!
Тэрийэр бөлөх.
