Ийэ тыл күнүгэр аналлаах «Төрөөбүт төрүт тыл оҕо уһуйааныгар» диэн тиэмэҕэ иитээччилэр сүбэ мунньахтара «Кэнчээри» оҕону сайыннарар киинигэр буолан ааста.
Киирэр аантан бэлэмнэнии бөлөх уолаттара күпсүүргэ оонньоотулар, хомус тыаһынан мунньахтыыр саалаҕа арчыланан, боҕуруоскай отунан буруолатан, быырпаҕынан, алаадьынан айах тутан ыалдьыттарын көрүстүлэр.
Кэнчээрилэр оҕо сахалыы сайдар эйгэтин тэрийиигэ туруорбут быыстапкалара, сахалар төрүт дьарыктарын көрдөрөр: булчут үүтээнэ, туттар сэбэ-сэбиргэлэ, отуу, сахалыы туос иһиттэр көрөөччү биһирэбилин ыллылар. Сүбэ мунньахха саха тылын уонна литэрэтиирэтин учууталларын II сийиэһин дэлэгээтэ, Соморсуннааҕы «Чэчир» оҕону сайыннарар киин иитээччитэ Мария Лаврентьевна Емельянова саха оҕотун сахалыы иитиигэ төрөөбүт төрүт тыл суолтатын дириҥ ис хоһоонноохтук арыйан кэпсээбитэ сэҥээриини ылла. «Хатыҥчаана» уһуйаан иитээччитэ Туяра Александрова Борисова, Бөтүҥнээҕи «Мичээр» оҕону сайыннарар киин иитээччитэ Ульяна Геннадьевна Борисова, «Кэнчээри» оҕо сайдар киинин иитээччитэ Юнона Николаевна Васильева оҕону иитиигэ-үөрэтиигэ төрөөбүт төрүт тыл уһуйааннарга туруктарын билиһиннэрдилэр, уоппуттарын үллэһиннилэр. Улуустааҕы үөрэх салалтатын испэсилииһэ Алтана Алексеевна Артемьева оҕо саҥатын сайыннарыыга сүбэлэри биэрдэ, иитээччилэр тылларын баайын тургутан көрдө. Мунньахха кыттыбыт хас биирдии иитээччи «Төрөөбүт төрүт тылым» диэн саха тылыгар аналлаах хоһооннору дорҕооннохтук ааҕан, тылбытын хайдах харыстаан, инники үлэлэри хайдах ыытыахха сөбүн туһунан санааларын атастаһыыларынан мунньах түмүктэннэ.
