Амма улууһугар Чурапчытааҕы физическэй култуураҕа уонна успуортка судаарыстыбаннай институт дэлэгээссийэтэ үүнэр ыччаты идэҕэ туһаайар сыаллаах ыалдьыттаата. Үөрэх кыһатын уһуйааччылара, устудьуоннара Амма 1N-дээх, Абаҕа, Бөтүҥ, Чапылҕан орто оскуолаларын улахан кылаастар үөрэнээччилэрин кытта көрүстүлэр, Н.С.Захаров-Сахаачча аатынан оҕо успуордун оскуолатын иитиллээччилэригэр хапсаҕайга, чэпчэки атлетикаҕа, атах оонньууларыгар маастар кылаастары ыыттылар.
Дэлэгээссийэ састаабын салайааччыта, педагогика наукатын кандидата, институт үөрэх чааһыгар проректора Евгений Коркин, орто үөрэхтээһин декана, ыстаарсай преподаватель Марианна Кардашевская, Баһылай Манчаары аатынан өрөспүүбүлүкэтээҕи успуорт төрүт көрүҥнэрин киинин тириэньэрдэрэ көҥүл тустууга РФ успуордун маастара, хапсаҕайга успуорт маастара, СӨ физическэй култуураҕа уонна успуортка маастара, Үөһээ Бүлүү Үөдүгэй нэһилиэгин ытык олохтооҕо Айаал Павлов, саха төрүт ыстаныыларыгар успуорт маастара, СӨ физическэй култуураҕа уонна успуортка маастара Иван Чиркоев, институт үөрэххэ тутар хамыыһыйатын начаалынньыга Мария Оконешникова уонна устудьуоннар сүбэлэрин кыттыылаахтара үөрэх кыһатын туһунан билиһиннэрдилэр. Үөрэнээччилэр, учууталлар ыалдьыттарга араас ыйытыылары биэрдилэр. Төгүрүк остуолга улуус дьаһалтатын успуортка уонна физическэй култуураҕа салалтатын начаалынньыга Дмитрий Наумов, үөрэх салалтатыттан сүрүннүүр исписэлииһэ Алтана Артемьева, успуорт оскуолатын мас тардыһыытыгар тириэньэрэ Афанасий Владимиров онтон да атыттар санааларын эттилэр.
Дмитрий Неустроев, Н.С.Захаров-Сахаачча аатынан оҕо успуордун оскуолатын дириэктэрэ: “Чурапчытааҕы институтка Анатолий Баишев, Владимир Егоров курдук ааттаах-суоллаах спортсменнарбыт үөрэммиттэрэ. Маны таһынан оҕо успуордун оскуолатын исписэлиистэрин таһаара олорор биир тутаах кыһабыт буолар. Ол курдук институкка билигин биһиги оскуолабытыгар үлэлии сылдьар 19 тириэньэрбит уонна 3 методиспыт үөрэммиттэрэ. Олор истэригэр оҕолору тустууга уһуйар Егор Скрябин, Афанасий Афанасьев, Михаил Неустроев, Степан Скрябин, Мичил Попов, волейболга Алексей Жирков, Артем Захаров, Александр Капитонов, Туяра Емельянова, чэпчэки атлетикаҕа Марианна Нестерева, Вероника Николаева, мас тардыһыытыгар Андрей Барашков, дуобакка Антон Пермяков, остуол тенниһигэр Айыына Петрова курдук тириэньэрдэрбит иитиллэн тахсыбыттара. Институт преподавателлэрэ ааспыт сылларга Аммаҕа кэлэн үөрэнээччилэри физическэй бэлэмнэригэр анаан эксээмэни тутар этилэрэ, ол түмүгүнэн оҕолорбут үөрэххэ киирэллэрэ. Уһун кэмнээх дьаҥ турбутунан тохтобул кэнниттэн бу кэлэннэр эмиэ иитиллээччилэрбитин кытта көрүстүлэр, үрдүк таһымнаах уһуйааччылар туһалаах маастар кылаастары биэрдилэр. Үүнэр ыччаппыт сайдыытыгар бу курдук салгыы ситимнээхтик бииргэ үлэлэһиэхпит”.
Аэлита Пахомова, Амма 1N-дээх орто оскуолатын 11а кылааһын үөрэнээччитэ: “Быйыл осколаны бүтэрэбин. Идэбин успуоруду кытта ситимниир эмиэ баҕалаахпын. Мин успуорт оскуолатыгар волейбол сиэксийэтигэр Туяра Федоровна Абрамоваҕа дьарыктанабын. Хамаанданан өрөспүүбүлүкэҕэ элбэх ситиһиилээхпит, икки төгүл Хабаровскай кыраайга күрэхтэһэ сылдьыбыппыт. Институт преподавателлэрэ уонна устудьуоннар кэпсииллэрин сэҥээрэн иһиттибит. Үөрэнэргэ уонна олорорго олус үчүгэй усулуобуйа баар эбит. Тыа сиригэр соҕотох баар үрдүк үөрэх кыһатыгар үөрэнэр саха оҕотугар, ордук ыаллыы сытар улууспутугар аммаларга олус табыгастаах. Манна олус үчүгэйдик үөрэтэллэр, эрчийэллэр, дьарыктыыллар, күрэхтэһиилэргэ кытыннараллар, устудьуон сайдарыгар улахан кыаҕы биэрэллэр диэн өйдөөтүм. Үчүгэй сыаналарынан үөрэнэ устудьуон истипиэндьийэтэ улахан, социальнай көмөҕө наадыйааччыга улахан көмө оҥоһуллар, бастыҥ үөрэнээччилэри, актыбыыстары, улахан күрэхтэһиилэр кыайыылаахтарын бары өттүнэн харчынан даҕаны наҕараадалыыллар, соҕуруу куораттарга сынньата даҕаны ыытан өйүүллэр эбит. Чурапчы институтугар киирбит устудьуон ханна да аралдьыйбакка тыа сирин эйгэтигэр, дьиэтигэр олорон кэриэтэ үөрэнэрэ төттөрүтүн кини сайдарыгар, идэтин баһылыырыгар улахан көмөлөөх буолуо дии санаатым”.
