Амматааҕы үөрэх салалтата тэрийиитинэн «Аныгы кэмҥэ оҕону иитиигэ дьиэ кэргэн оруола» диэн төрөппүттэргэ аналлаах улуустааҕы мунньах буолла. Манна ыҥырыылаах ыалдьыттар СӨ култууратын үтүөлээх үлэһитэ, «Кэскил» хаһыат эрэдээксийэтин салаатын сэбиэдиссэйинэн үлэлээбит, Айыы үөрэҕин тарҕатааччы уонна Айыы кыһатын учуутала, суруналыыс, этнопедагог, тыл үөрэҕин билимин хандьыдаата Анатолий Павлов-Дабыл уонна СӨ норуот үөрэҕириитин туйгуна, СӨ идэтийбит үрдүк үөрэҕириитин туйгуна, СӨ култууратын туйгуна, Муома улууһун бочуоттаах олохтооҕо, Мэҥэ-Хаҥалас улууһун 1 Тыыллыма нэһилиэгин бочуоттаах олохтооҕо, М.К.Аммосов аатынан ХИФУ РФ Хотугулуу-Илиҥҥи норуоттар тылларын уонна култуураларын үнүстүүтүн культурология хаапыдыратын дассыана, педагогика билимин хандьыдаата, бэрэпиэссэр Галина Семеновна Попова-Санаайа буоллулар.
Аммаҕа ыытыллыбыт улуустааҕы мунньахха нэһилиэк оскуолаларын, уһуйааннарын төрөппүттэрэ, оҕону иитиигэ эппиэттээх дьон, төрөппүт сүбэтин, кэмитиэтин кыттыылаахтара, иитэр үлэҕэ педагогтар, дириэктэрдэр, сүбэһиттэр, дириэктэри иитэр үлэҕэ солбуйааччылар, тэрийээччилэр, кылаас салайааччылара, сэбиэдиссэйдэр, сэбиэдиссэйи солбуйааччылар, иитээччилэр кытыннылар. Мустубут дьон билиҥҥи кэмҥэ оҕону иитиигэ ийэ, аҕа оруолун туһунан, баар кыһалҕалар тула ирэ-хоро кэпсэтилэр. Төрөппүттэр, педагогтар араас ыйытыктарыгар сөптөөх хоруйдары ыллылар. Мунньах түмүгүнэн ылыллыбыт резолюция оҕону иитиигэ биир улахан суолталаах эркээйи буолуоҕа.
